2023-24ವ್ಯಾ ಕ್ರೀಸ್ತಿ ಶಿಕ್ಷಣ್ ವರ್ಸಾಚೆಂ ಉಗ್ತಾವಣ್ 

ಕಾಮೆಲಿ ಸಾಂ ಜುಜೆಕ್ ಸಮರ್ಪಿಲ್ಲ್ಯಾ ನೀರ್ಮಾರ್ ಫಿರ್ಗಜೆಂತ್ 2023, 4ವೆರ್ ಆಯ್ತಾರಾಚೆಂ ಕ್ರೀಸ್ತಿ ಶಿಕ್ಷಣ್ ವರ್ಸಾಚೆಂ ಉಗ್ತಾವಣ್ ಸಕಾಳಿಂ7.30 ವರಾಂಚ್ಯಾ ಮಿಸಾವೆಳಾ ಭುರ್ಗಿಂ, ವ್ಹಡಿಲಾಂ ಆನಿ ಮಾಲ್ಘಡ್ಯಾಂಚ್ಯಾ ಉಪಸ್ಥಿತೆಂತ್ ವ್ಹಡಾ ಸಂಭ್ರಮಾನ್ ಆಚರಣ್ ಕೆಲೆಂ.

ಮಾ| ಬಾ| ಪಾವ್ಲ್ ಪಿಂಟೊಚ್ಯಾ ಮಾರ್ಗದರ್ಶನಾಖಾಲ್, ಕ್ರೀಸ್ತಿ ಶಿಕ್ಷಣಾಚಿ ಸಂಯೋಜಕಿ ಮಾನೆಸ್ತಿಣ್ ಬೆನೆಡಿಕ್ಟಾ ಮಚಾದೊ ಆನಿ ಸರ್ವ್ ಕ್ರೀಸ್ತಿ ಶಿಕ್ಷಣ್ ಶಿಕಂವ್ಚ್ಯಾ ಶಿಕ್ಷಕಾಂಚ್ಯಾ ಸಹಕಾರಾನ್ ಹಾತಾಂತ್ ಫುಲಾಂ ಝಾಡಾಂ ಘೆತ್‌ಲ್ಲಿಂ ದೊಗಾಂ ಭುರ್ಗಿಂ, ಹಾತಾಂತ್ ಪವಿತ್ರ್ ಪುಸ್ತಕ್ ಘೆತ್‌ಲ್ಲಿಂ ತಾಂಚಿಂ ವ್ಹಡಿಲಾಂ, ‘ಕ್ರೀಸ್ತಿ ಶಿಕ್ಷಣ್ ಬರ್‍ಯಾ ಕುಟ್ಮಾಕ್ ಪ್ರೇರಣ್’ ಮ್ಹಳ್ಳೊ ಧ್ಯೇಯ್ ವಾಕ್ಯ್ ಹಾತಾಂತ್ ಘೆತ್‌ಲ್ಲ್ಯಾ ಭುರ್ಗ್ಯಾಂ ಬರಾಬರ್ ಶಿಕ್ಷಕಾಂನಿ ಪುರ್ಶಾಂವಾರ್ ಯೇವ್ನ್ ವೆದಿಕ್ ಫುಡ್ ಕರ್ನ್ ರಾವ್ಲಿಂ.

ಆವಯ್-ಬಾಪಯ್ ಆಪ್ಲ್ಯಾ ಭುರ್ಗ್ಯಾಂಕ್ ಕ್ರಿಸ್ತಾಂವ್ ಶಿಕ್ಷಣ್ ಆನಿ ಪವಿತ್ರ್ ಪುಸ್ತಕಾಚಿ ವಳಕ್ ದಿಂವ್ಚ್ಯಾಂತ್ ಪ್ರಮುಕ್ ಪಾತ್ರ್ ಘೆತಾತ್ ಮ್ಹಳ್ಳ್ಯಾಚೊ ಸಂಕೇತ್ ಜಾವ್ನ್ ಹಾತಿಂ ಪವಿತ್ರ್ ಪುಸ್ತಕ್ ಘೆತಲ್ಲ್ಯಾ ಆವಯ್-ಬಾಪಾಯ್ನ್ ತಾಂಚ್ಯಾ ಭುರ್ಗ್ಯಾಂಚ್ಯಾ ಖಾಂದ್ಯಾರ್ ಹಾತ್ ದವರ್ತಾನಾ ಮಾ| ಬಾ| ಪಾವ್ಲ್ ಪಿಂಟೊನ್ ಭುರ್ಗ್ಯಾಂನಿ ವೆದಿರ್ ದವರ್‌ಲ್ಲ್ಯಾ ಝಾಡಾಕ್ ಉದಕ್ ವೊತ್ಚೆದ್ವಾರಿಂ ಸಾಂಕೇತಿಕ್ ರಿತಿನ್ ಕ್ರೀಸ್ತಿ ಶಿಕ್ಷಣ್ ವರಸ್ ಉಗ್ತಾವಣ್ ಕೆಲೆಂ. ‘ಪವಿತ್ರ್ ತ್ರಿಂದಾದಿ ಮೊಗಾಚೊ, ಎಕ್ವಟಾಚೊ ಪ್ರತಿರೂಪ್, ದಿಂವ್ಚ್ಯಾಂತ್ ಆಮ್ಚೆಂ ಜಿವಿತ್ ರೂಪಿತ್ ಕರಿಜೆ, ಸಂಬಂಧ್ ಬಾಂದುನ್ ಹಾಡ್ಚೆ ತಸಲೆ ವ್ಯಕ್ತಿ ಜಾಯ್ಜೆ’ ಮ್ಹಳ್ಳ್ಯಾ ವಿಶಯಾಚೆರ್ ವಿಗಾರ್ ಬಾಪಾಂನಿ ಅಪುರ್ಬಾಯೆಚೊ ಪ್ರಸಂಗ್ ದಿಲೊ.

ಮಾನೆಸ್ತ್ ಅರುಣ್ ಡಿಸೋಜಾಚ್ಯಾ ಮುಕೆಲ್ಪಣಾರ್ ಭುರ್ಗ್ಯಾಂನಿ ರಂಗೀನ್ ತಾಳ್ಯಾನ್ ಗಿತಾಂ ಗಾವ್ನ್ ಮಿಸಾಚಿ ಸೊಭಾಯ್ ಚಡಯ್ಲಿ. ಸರ್ವ್ ಲೊಕಾನ್ ಮಿಸಾಚ್ಯಾ ಬಲಿದಾನಾಂತ್ ತಶೆಂ ಸಾಕ್ರಾಮೆಂತಾಚ್ಯಾ ಆರಾಧಾನಾಂತ್ ಭಕ್ತಿಪಣಾನ್ ಪಾತ್ರ್ ಘೆತ್ಲೊ.